Start Up - მთავარი

1. ზოგადი დებულებები
1.1 წინამდებარე „სტარტაპ აქსელერაციის პროგრამის წესები და პირობები“ (შემდგომში - „წესები და
პირობები“) არეგულირებს სააქსელერაციო პროგრამის (შემდგომში - „აქსელერაციის
პროგრამა“/“პროგრამა“) ორგანიზების, ჩატარების წესებს და მასთან დაკავშირებულ სხვა საკითხებს.
ამასთან, აღნიშნული „წესები და პირობები“ არეგულირებს შპს „თეგეტა კაპიტალს“, შპს „ფიუჩერ
ლაბორატორი მენეჯმენტს“ და „პროგრამაში“ მონაწილეობის მსურველს/დარეგისტრირებულ პირს
(შემდგომში - „პროგრამის მონაწილე“/“მონაწილე“) შორის ურთიერთობას.
1.2 „პროგრამის“ მიზანია ქვეყნის მასშტაბით სტარტაპების განვითარების და ახალი ბიზნესის წამოწყების
სტიმულირების ხელშეწყობა, რაც განხორციელდება ავტოინდუსტრიის ლიდერი კომპანიის, შპს „თეგეტა
მოტორსის“ (საიდენტიფიკაციო ნომერი: 202177205) შვილობილი კომპანიის, შპს „თეგეტა კაპიტალის“
(შემდგომში - „თეგეტა კაპიტალი“/“კომპანია“) მხარდაჭერითა და შპს “ფიუჩერ ლაბორატორი
მენეჯმენტის“ (შემდგომში - „ფიუჩერ ლაბ“) ორგანიზებით.
1.3 პროგრამის ფარგლებში შესაძლოა დაფინანსდეს ნებისმიერი პროექტი, ბიზნეს იდეა, რომლის
განხორციელებაც არ არის აკრძალული საქართველოს კანონმდებლობით და რომელიც წარმოდგენილი
იქნება შემდეგი მიმართულებით:

სატრანსპორტო უსაფრთხოება;
ავტომობილის ყიდვა/გაყიდვა;
ავტომობილების სერვისი;
ეკოლოგიურად სუფთა ტრანსპორტი;
ერთობლივი გამოყენების ტრანსპორტი;
საკომუნიკაციო სისტემები ტრანსპორტისთვის;
სატრანსპორტო გადაზიდვები;
ნავიგაცია და გართობა;
ავტონომიური/ჭკვიანი ტრანსპორტი;
ავტომობილების წარმოება;
დრონები;
სადაზღვევო და საფინანსო ინოვაციები სატრანსპორტო დარგში.

1.4 პროექტების შერჩევის პროცესი წარიმართება კონკურსის წესით, წარმოდგენილი განაცხადებიდან
საუკეთესო პროექტების შერჩევის გზით. ბიზნეს იდეა უნდა აკმაყოფილებდეს შემდეგ პირობებს:

უნდა იყოს ინოვაციური და ჰქონდეს ბიზნეს პერსპექტივა;
განცხადებელს უნდა გააჩნდეს საკუთარი პროექტის განხორციელებისთვის საჭირო ხედვა და მზადყოფნა;

1.5. „პროგრამა“/“კონკურსი“ ეფუძნება სამართლიანობის, გამჭვირვალობის, არადისკრიმინაციულობის,
ობიექტურობის, მიუკერძოებლობის, თავისუფალი და ჯანსაღი კონკურენციის პრინციპებს.

2. ტერმინთა განმარტება
ა) „თეგეტა კაპიტალი“ - შპს „თეგეტა კაპიტალი“ (საიდენტიფიკაციო ნომერი: 405498509; იურიდიული
მისამართი: საქართველო, ქ. თბილისი, დავით აღმაშენებლის ხეივანი N129).
ბ) „ფიუჩერ ლაბ“ - შპს “ფიუჩერ ლაბორატორი მენეჯმენტი” (საიდენტიფიკაციო ნომერი: 405212657;
იურიდიული მისამართი: საქართველო, ქ. თბილისი, ვაკე-საბურთალოს რაიონი, მოსაშვილის ქ., N3, ბ.
N28);
გ) „პროგრამის მონაწილე“/„კონკურსის მონაწილე“ - საქართველოში რეგისტრირებული მეწარმე
სუბიექტი შეზღუდული პასუხისმგებლობის საზოგადოების ფორმით ან საქართველოს მოქალაქე ნებისმიერი
ფიზიკური პირი (ან ფიზიკურ პირთა გაერთიანება - „პირთა ჯგუფი“), რომელიც არ არის დასაქმებული შპს
„თეგეტა მოტორსში“/ შპს “ფიუჩერ ლაბორატორი მენეჯმენტში“ ან/და ამავე კომპანიების შვილობილ ან და
დაკავშირებულ კომპანიებში ან/და არ არის ასეთი პირის ოჯახის წევრი. (შეზღუდული პასუხისმგებლობის
საზოგადოების შემთხვევაში აღნიშნული შეზღუდვა ვრცელდება კომპანიის დამფუძნებელზე და
დირექტორზე). წინამდებარე პუნქტის მიზნებისთვის „ოჯახის წევრად“ განიმარტება დედა, მამა, მეუღლე,
შვილი, და-ძმა.
დ) „განმცხადებელი“ - სრულწლოვანი ფიზიკური პირი, რომელიც რეგისტრირდება „სისტემაში“ და
ეთანხმება წინამდებარე წესებს და პირობებს. პირთა გაერთიანების შემთხვევაში განმცხადებლად მიიჩნევა
ფიზიკური პირი, რომელიც პირთა ჯგუფის სახელით წარადგენს სისტემაში განაცხადს და ავსებს თითოეული
მონაწილის შესახებ ინფორმაციას, ხოლო შეზღუდული პასუხისმგებლობის საზოგადოების შემთხვევაში -
დირექტორი ან წარმომადგენლობითი უფლებამოსილების მქონე ნებისმიერი სხვა პირი, რომელიც
სისტემაში განაცხადს წარადგენს შეზღუდული პასუხისმგებლობის საზოგადოების სახელით.

ე) „პროგრამა“ - სააქსელერაციო პროგრამა, რომელიც შედგება წინამდებარე დოკუმენტით
განსაზღვრული ეტაპებისგან და გრძელდება 4 (ოთხი) თვის განმავლობაში.
ვ) „განაცხადი“ – „პროგრამის“ ფარგლებში მონაწილის მიერ წერილობითი ფორმით მომზადებული
განცხადი (თანდართულ დოკუმენტებთან ერთად) რომელიც წინამდებარე წესის შესაბამისად ატვირთულ
უნდა იქნეს მონაწილის მიერ შემდეგ ვებ-გვერდზე - www.startupdrive.ge.
ზ) „სისტემა“ – „თეგეტა კაპიტალისა“ და „ფიუჩერ ლაბის“ მიერ ადმინისტრირებული ვებ-გვერდი
www.startupdrive.ge., რომელიც განკუთვნილია კონკურსის მონაწილეების მიერ განაცხადების
განთავსებისთვის.

3. სისტემაში რეგისტრაციის პირობები
3.1. "განმცხადებელი" "სისტემაში" რეგისტრირდება წინამდებარე "წესების და პირობების" შესაბამისად."
რეგისტრაციამდე "განმცხადებელი" ვალდებულია გაეცნოს მასში მითითებულ პირობებს. სისტემაში
რეგისტრაციისას ფიზიკური პირი ვალდებულია შეავსოს ვებ.გვერდზე მოთხოვნილი შემდეგი პერსონალური

მონაცემები:
სახელი, გვარი;
პირადი ნომერი;
დაბადების თარიღი;
ელექტრონული ფოსტის მისამართი;
იურიდიული და ფაქტობრივი მისამართი;
ტელეფონის ნომერი.

3.1.1 იმ შემთხვევაში, თუ სისტემაში რეგისტრაციას ახორციელებს ფიზიკური პირი ფიზიკურ პირთა ჯგუფის
სახელით, „განმცხადებელი“ ჯგუფში არსებული ყველა პირის თანხმობით ავსებს თითოეული ფიზიკური
პირის შესახებ სისტემაში 3.1 პუნქტში მითითებულ მონაცემებს.
3.2 იმ შემთხვევაში, თუ სისტემაში რეგისტრაციას ახორციელებს იურიდიული პირის, შპს-ს
წარმომადგენელი, წარმომადგენელი ვალდებულია მიუთითოს იურიდიული პირის შესახებ შემდეგი სახის
ინფორმაცია:

საფირმო სახელწოდება;
საიდენტიფიკაციო ნომერი;
იურიდიული და ფაქტობრივი მისამართი;
ელექტრონული ფოსტის მისამართი;
საკონტაქტო პირის ტელეფონის ნომერი;

3.2.1 იურიდიული პირის სახელით განაცხადის შევსების დროს წარმომადგენელი ვალდებულია სისტემაში
ატვირთოს წარმომადგენლობითი უფლებამოსილების დამადასტურებელი დოკუმენტი და დამატებით
შეავსოს წარმომადგენლის შესახებ შემდეგი სახის ინფორმაცია:

სახელი, გვარი;
პირადი ნომერი.

3.3 "სისტემაში" რეგისტრაციით „განმცხადებელი“ აცხადებს ნებაყოფლობით თანხმობას წინამდებარე
"წესების და პირობების" მოქმედება გავრცელდეს მასზე (პირთა ჯგუფის სახელით განაცხადის ატვირთვის
დროს პირთა ჯგუფის სახელით, ხოლო შპს-ს შემთხვევაში, შპს-ს სახელით), შესაბამისად, "სისტემაში"
რეგისტრაციის შემდეგ "კონკურსის მონაწილე" ავტომატურად ექცევა წინამდებარე "წესებისა და
პირობების" მოქმედების ფარგლებში,
3.4 რეგისტრაციის დასრულების ღილაკზე ხელის დაჭერით დასტურდება, რომ „კონკურსის მონაწილე“
გაეცნო და დაეთანხმა წინამდებარე "წესებს და პირობებს" და წარმოეშვა მასში გათვალისწინებული
უფლებები და მოვალეობები.
3.5 "სისტემაში" რეგისტრაციის გზით „განმცხადებელს“ ენიჭება უფლება გაიაროს ავტორიზაცია სისტემაში.
ავტორიზებული „კონკურსის მონაწილე“ უფლებამოსილია „კონკურსში“ მონაწილეობის მიღების მიზნით
განათავსოს განაცხადი სისტემაში.

4. სტარტაპ აქსელერაციის კონკურსის ეტაპები
4.1 სტარტაპ აქსელერაციის კონკურსი მოიცავს შემდეგ ეტაპებს:
ა) კონკურსის გამოცხადება;
ბ) განაცხადების მიღება;
გ) განაცხადების განხილვა;
დ) პრეაქსელერაცია;
ე) აქსელერაცია;
ვ) დემო დღე;

ზ) საუკეთესო განაცხად(ებ)ის გამოვლენა და ინვესტირების პირობებზე შეთანხმების შემთხვევაში წილის
ნასყიდობის შესაბამისი ხელშეკრულების გაფორმება.

4.2 კონკურსის გამოცხადება განხორციელდება „ვებ.გვერდზე“ ინფორმაციის განთავსებით, მონაწილეებს
შესაძლებლობა ექნებათ ატვირთონ სისტემაში განაცხადი იმ ვადაში, რაც განსაზღვრული იქნება კონკურსის
გამოცხადების დროს ინფორმაციის განთავსებისას;
4.3 განაცხადების განხილვა მიზნად ისახავს თითოეული მიღებული განაცხადის ინოვაციურობისა და
პერსპექტიულობის შეფასებას. განაცხადების განხილვას და შეფასებას უზრუნველყოფს „ფიუჩერ ლაბის“
საკონკურსო კომისია.
4.4 განაცხადების განხილვის შემდგომ „ფიუჩერ ლაბის“ მიერ მიღებული გადაწყვეტილების შესაბამისად
არაუმეტეს 30 განაცხადი გადაყვანილი იქნება პრეაქსელერაციის ეტაპზე;
4.5 პრე-აქსელერაციის ეტაპი მიზნად ისახავს და მოიცავს შემდეგს:

სტარტაპ იდეის საბაზრო პოტენციალის დადგენას;
გუნდის ეფექტურობის შემოწმებას;
სატესტო ვერსიაზე მუშაობის დასაწყებად იდეის დახვეწას.

4.5.1 პრეაქსელერაციის ეტაპის ხანგრძლივობაა 3 კვირა; „ფიუჩერ ლაბის“ მიერ მიღებული
გადაწყვეტილების შესაბამისად არაუმეტეს 15 განაცხადი გადაყვანილი იქნება აქსელერაციის ეტაპზე;
4.6 აქსელერაციის ეტაპის მიზანია სტარტაპებმა შექმნან მათი იდეის პროტოტიპის MVP (Minimum Viable
Product) და განახორციელონ ტესტირება რეალურ მომხმარებლებზე.
4.6.1 აქსელერაციის ეტაპის ხანგრძლივობაა - 3 თვე. აქსელერაციის ეტაპზე „მონაწილეები“ იღებენ
ფინანსურ და არაფინანსურ მხარდაჭერას, კერძოდ, მონაწილეობას იღებენ ტრენინგებში და სემინარებში
მოწვეული პრაქტიკოსი ტრენერების და სპიკერების ჩართულობით. „მონაწილეები“ განახორციელებენ
საკუთარი ამოცანების ყოველკვირეულად დაგეგმას და მათი შედეგების განხილვას. აქსელერაციის ეტაპზე
მონაწილეები განაგრძობენ ყოველკვირეული დაგეგმარების პროცესს, შეხვედრებს და პროგრეს
რეპორტების წარდგენას, რეალურ მომხმარებლებზე პროდუქტის ტესტირებას.
4.7 აქსელერაციის ეტაპის დასრულების შემდეგ ჩატარდება დემო დღე, რომელზეც თითოეული მონაწილე
წარადგენს სტარტაპ იდეების საფუძველზე შექმნიმ პროტოტიპს და მის ფინანსურ მოდელს საკონკურსო
კომისიის წინაშე, სადაც განხორციელდება კონკურსში გამარჯვებულის გამოვლენა.
4.7.1 სტარტაპები საბოლოო პროდუქტს წარმოადგენენ სპეციალურად ორგანიზებულ დემო დღეზე,
რომელსაც დაესწრება საკონკურსო კომისია და გამოავლენს არანაკლებ 1 და არაუმეტეს 5 საუკეთესო
იდეას/განაცხადს შემდგომი ინვესტირებისთვის. დემო დღეზე საკონკურსო კომისია შეაფასებს
წარმოდგენილი განაცხადების/პროექტების ინოვაციურობას, ეფექტიანობასა და მდგრადობას და
აღნიშნული კრიტერიუმების გათვალისწინებით მიიღებს გადაწყვეტილებას კონკურსში გამარჯვებულის
გამოვლენის შესახებ. გამარჯვებული შესაძლოა იყოს არანაკლებ 1 და არაუმეტეს 5 ბიზნეს იდეა.
საინვესტიციო ფონდი განისაზღვრება არაუმეტეს 200,000.00 ლარისა, რაც „თეგეტა კაპიტალისა“ და
„ფიუჩერ ლაბის“ შეხედულებით, მათ მიერ განსაზღვრული ოდენობით, შპს „თეგეტა კაპიტალისთვის“
შესაბამისი წილის ოდენობის დათმობის სანაცვლოდ შესაძლოა განაწილდეს თითოეულ ბიზნეს იდეაზე.
ყველა იმ გამარჯვებულ პირთან, რომლისთვისაც გამოყოფილი იქნება საინვესტიციო ფონდი, აღნიშნულის
სანაცვლოდ „თეგეტა კაპიტალი“ დამატებით გააფორმებს ნასყიდობის ხელშეკრულებას შპს „თეგეტა
კაპიტალის“ მიერ განსაზღვრულ წილის ოდენობაზე.

5. მხარეთა უფლება-მოვალეობები
5.1 "კომპანია" უფლებამოსილია:
5.1.1 შეცვალოს წინამდებარე" "წესები და პირობები" ნებისმიერ დროს და განათავსოს "სისტემაში".
ამასთან, აღნიშნული ცვლილებების შესახებ "კომპანია" უფლებამოსილია "კონკურსის მონაწილეს",
დამატებით გაუგზავნოს შეტყობინება მის მიერ რეგისტრაციის დროს მითითებულ საკონტაქტო ტელეფონის
ნომერზე.
5.1.2 შეწყვიტოს "კონკურსის მონაწილის" "სისტემასთან" წვდომა ნებისმიერ დროს ტექნიკური პრობლემის,
შეცდომის, უზუსტობის, ავტორიზებული "კონკურსის მონაწილის" მხრიდან უკანონო მოქმედებების
განხორციელების ან სხვა მიზეზის გამო, რომელმაც შეიძლება ზიანი მიაყენოს "სისტემას" ან თავად
"კომპანიას". 5.1.3 იმ შემთხვევაში, თუ "კომპანიისთვის" ცნობილი გახდება, რომ "კონკურსის მონაწილის"
მიერ რეგისტრაციის დროს გამოყენებულ იქნა სხვა პირის მონაცემები ან თუ "კონკურსის მონაწილის"
მხრიდან განხორციელდება წინამდებარე "წესებით და პირობებით" გათვალისწინებული ვალდებულებების
დარღვევა, "კომპანია" უფლებამოსილია განახორციელოს "კონკურსის მონაწილის" დაბლოკვა და
შეუზღუდოს "კონკურსის მონაწილეს" (იმავე მონაცემების მქონე პირს) ხელახალი რეგისტრაციის უფლება.
5.1.4. „კომპანიას“ აქვს უფლება უარი უთხრას „კონკურსის მონაწილეს“ განაცხადის განთავსებაზე ან/და
ამოიღოს სისტემიდან უკვე განთავსებული განაცხადები საკუთარი შეხედულებისამებრ, თუ აღნიშნული ეწინააღმდეგება კომპანიის მიერ განსაზღვრულ კონკურსის პირობებს. ასეთ შემთხვევაში, კომპანია არ
არის ვალდებული შეატყობინოს ავტორს განაცხადის განთავსებაზე უარის ან/და მისი სისტემიდან ამოღების
მიზეზი.
5.1.5 აქსელერაციის ეტაპზე გადასულ თითოეულ ბიზნესიდეაზე გამოყოს დაფინანსება არაუმეტეს 5,000.00
ლარის ოდენობით პროტოტიპის შექმნისთვის;
5.1.6 წინამდებარე წესებითა და პირობებით გათვალისწინებული უფლება-მოვალეობები მონაწილის ან
ნებისმიერი სხვა პირის დამატებითი თანხმობის გარეშე გადასცეს სხვა პირს მისი შეხედულებისამებრ.

5.2 „განმცხადებელი“/"კონკურსის მონაწილე" ვალდებულია:
5.2.1 "სისტემაში" რეგისტრაციის დროს მიუთითოს რეალური, სრულყოფილი, ზუსტი და მხოლოდ მის
შესახებ არსებული მონაცემები. იმ შემთხვევაში, თუ განმცხადებელი სისტემაში ტვირთავს ბიზნეს იდეას
პირთა ჯგუფის სახელით და ავსებს თითოეული მონაწილის მონაცემებს, ვალდებულია მონაცემების
ატვირთვამდე მოიპოვოს შესაბამისი ინფორმირებული თანხმობა თითოეული პირისგან. აღნიშნული
ქვეპუნქტით გათვალისწინებული ვალდებულების დარღვევის შემთხვევაში თავად აგებს პასუხს"კომპანიის"
და მესამე პირების წინაშე.
5.2.2 "კონკურსის მონაწილე“ ვალდებულია არ გაამჟღავნოს "სისტემაში" ავტორიზაციისთვის საჭირო
"კონკურსის მონაწილის" პაროლი. აღნიშნული ქვეპუნქტის დარღვევით გამოწვეულ ზიანზე
პასუხისმგებელია თავად "კონკურსის მონაწილე".
5.2.3 დაიცვას წინამდებარე "წესები და პირობები".
5.2.4 ვალდებულია კონკურსში მონაწილეობის მიღების მიზნით, ატვირთოს განაცხადი „კომპანიის“ მიერ
განსაზღვრული პირობების შესაბამისად, რომელიც განთავსებული იქნება „კომპანიის“ ვებ-გვერდზე ან/და
„კომპანიის“ ოფიციალურ სოციალურ ქსელებში.
5.2.5 სრულად აგოს პასუხი მის მიერ საიტზე განთავსებულ განაცხადთან დაკავშირებით, საქართველოს
კანონმდებლობით დადგენილი მოთხოვნების დაცვაზე.
5.2.6 „კონკურსის მონაწილე“ ვალდებულია შეატყობინოს „კომპანიას“, თუკი განაცხადის განთავსებასთან
დაკავშირებით „კომპანიის“ ან მესამე პირთა ქმედებებით დაირღვევა მისი უფლებები და ინტერესები.
5.2.7 თითოეული მონაწილე ვალდებულია მონაწილეობა მიიღოს პრეაქსელერაციისა და აქსელერაციის
ფარგლებში დაგეგმილ ყველა ღონისძიებაში.
5.2.8 იმ შემთხვევაში, თუ განაცხადის ავტორი ფიზიკური პირი ან ფიზიკურ პირთა ჯგუფია, ვალდებულია
აქსელერაციის ეტაპზე გადასვლის შემთხვევაში დააფუძნოს შეზღუდული პასუხისმგებლობის საზოგადოება;
5.2.9 აქსელერაციის ეტაპზე გადასვლის შემთხვევაში იმ ბიზნეს იდეის ავტორები, რომლებიც წარმოადგენენ
შეზღუდული პასუხისმგებლობის საზოგადოების პარტნიორებს, ვალდებულნი არიან, რომ „თეგეტა
კაპიტალთან“ და „ფიუჩერ ლაბთან“ გააფორმონ წილის წინარე ნასყიდობის ხელშეკრულება,
დაფუძნებული/არსებული საწარმოს არანაკლებ 5 და არაუმეტეს 7 % წილის თაობაზე, საიდანაც 30 %
წილის შემძენად განისაზღვრება „ფიუჩერ ლაბ“, ხოლო 70 %-ის „თეგეტა კაპიტალი“. წილის ზუსტი
ოდენობა განისაზღვრება მხარეთა შორის გაფორმებული წილის წინარე ნასყიდობის ხელშეკრულებით.
5.2.10 იმ შემთხვევაში, თუ მონაწილის შერჩევა განხორციელდება აქსელერაციის ეტაპზე, მაგრამ უარს
განაცხადებს აქსელერაციის გაგრძელებაზე, განაცხადის ავტორი ვალდებული იქნება აუნაზღაუროს
„თეგეტა კაპიტალს“ პრე-აქსელერაციის პროგრამის ღირებულება 5,000.00 ლარის ოდენობით, ხოლო იმ
შემთხვევაში თუ აქსელერაციის ეტაპზე მიღებული ექნება პროტოტიპის შექმნისთვის განკუთვნილი თანხა
არაუმეტეს 5,000.00 ლარის ოდენობით და ამის შემდეგ განაცხადებს უარს პროგრამაში მონაწილეობის
მიღებაზე, აუნაზღაუროს „თეგეტა კაპიტალს“ აღნიშნული თანხა შეწყვეტიდან არაუგვიანეს 3 (სამი) დღის
ვადაში.

6. "კონკურსის მონაწილის" პერსონალური მონაცემების დამუშავება/დაცვა
6.1 წინამდებარე ურთიერთობის მიზნებისთვის „თეგეტა კაპიტალი“ და „ფიუჩერ ლაბ“ წარმოადგენენ
„მონაწილეთა“ პერსონალურ მონაცემთა დამმუშავებელ პირებს და ისინი უზრუნველყოფენ მათი
კომპეტენციის ფარგლებში და მოქმედი კანონმდებლობის საფუძველზე "კონკურსის მონაწილის"
პერსონალური მონაცემების დაცვას.
6.2 „კონკურსის მონაწილე“ "სისტემაში" რეგისტრაციით თანხმობას აცხადებს, „კომპანიამ“ უზრუნველყოს
რეგისტრაციის პროცესში "კონკურსის მონაწილის" მონაცემების (სახელი გვარი, პირადი ნომერი,
ტელეფონის ნომერი, ელექტრონული ფოსტის მისამართი) მიღება, შენახვა და დამუშავება. აღნიშნული
თანხმობა გაცემულად ითვლება „კონკურსის მონაწილის" მიერ "სისტემაში" რეგისტრაციის პროცესის
დასრულებისას.

6.3 „კონკურსის მონაწილე“ უფლებამოსილია ნებისმიერ დროს მოსთხოვოს „თეგეტა კაპიტალს“ და
„ფიუჩერ ლაბს“ მისი პერსონალური მონაცემების გასწორება, განახლება, დამატება, დაბლოკვა, წაშლა ან
განადგურება კომუნიკაციის შემდეგი საშუალებით - ელექტრონული ფოსტის მისამართზე:
info@startupdrive.ge ელექტრონული შეტყობინების გაგზავნით, თუ ისინი არასრულია, არაზუსტია, არ არის
განახლებული ან თუ მათი შეგროვება და დამუშავება განხორციელდა კანონის საწინააღმდეგოდ. ასეთ
დროს "კომპანია" ვალდებულია მონაცემთა სუბიექტის მოთხოვნის მიღებიდან 15 (თხუთმეტი) დღის ვადაში
გაასწოროს, განაახლოს, დაამატოს, დაბლოკოს, წაშალოს ან გაანადგუროს მონაცემები ან მონაცემთა
სუბიექტს აცნობოს უარის თქმის საფუძველი.

7. დასკვნითი დებულებები
7.1 წინამდებარე წესებითა და პირობებით გათვალისწინებულ ურთიერთობებზე მოქმედებს საქართველოს
კანონმდებლობა.
7.2 ნებისმიერი უთანხმოება, რომელიც შეიძლება წარმოიშვას მხარეთა შორის, უნდა გადაწყდეს
მოლაპარაკების გზით, წინააღმდეგ შემთხვევაში, მხარეები მიმართავენ საქართველოში მოქმედ
სასამართლოს.
7.3. „კონკურსის მონაწილე“ თავად არის პასუხისმგებელი განაცხადის შინაარსზე, შესაბამისად, კომპანიას
არ ეკისრება პასუხისმგებლობა განაცხადების შინაარსსა და კანონმდებლობასთან მათ შეუსაბამობაზე,
საავტორო უფლებების დარღვევაზე, სასაქონლო ნიშნების, ფირმების დასახელებებისა და მათი
ლოგოტიპების არასანქცირებულ გამოყენებაზე, აგრეთვე, სისტემაში განაცხადის განთავსებასთან
დაკავშირებით მესამე პირთა უფლებების შესაძლო დარღვევაზე

გავეცანი წესებს და პირობებს

ვეთანხმები

პროექტის შესახებ

მიმართულებები

სტრუქტურა

პირობები

კონტაქტი

პროექტის შესახებ

პროექტის ორგანიზატორები

პარტნიორები და მხარდამჭერები

პროექტებში ინვესტირების დეტალები

აქსელერაციის მიმართულებები

1. სატრანსპორტო უსაფრთხოება

2. ავტომობილის ყიდვა/გაყიდვა

3. ეკოლოგიურად სუფთა ტრანსპორტი

4. ერთობლივი გამოყენების ტრანსპორტი

5. საკომუნიკაციო სისტემები ტრანსპორტისთვის

6. სატრანსპორტო გადაზიდვები

7. ნავიგაცია და გართობა

8. ავტონომიური/ჭკვიანი ტრანსპორტი

9. ავტომობილების წარმოება

10. დრონები

11. ავტომობილების სერვისი

12. სადაზღვეო და საფინანსო სერვისები ტრანსპორტისათვის

აქსელერაციაში მონაწილეობის სტრუქტურა

პირობები

კონტაქტი

რეგისტრაცია